زجلية / قلم الشاعر البيدة محمد

 ياودّي  لّي  شفتيه  راكب  ع  لْكلْخة

ݣولّو  مبارك  لعود  و مزّينو  ب  صفيحة

شحال  من  حمار  بغا   يِحنحن

ما طَوْعو  تهرنيطو  وَلا  فيه  حن

النسر  مْعاوْنو  فمّو  و ضفارو

بوفسّيو  ما ينفعو  غير  مُقّارو

جوج  حنوشا  ما يِسكنو   ف  غار

والصّابة  ما  تجي  بْلا  غبار

عود  لكرّوسة  ما  يحرّك  وسط  السربة

حروف  لقصيدة  ما  يتخيطو  ب  زّربة

إلى  شفتي  لعافية  شعلت

برّد  السوق  طفي  و سكت

ما تزوج  حتى  تعرف  فين  تحُط  رجليك

بنت  الأصل  يوم  لحزة  ما  تسمح  فيك  وتخلّيك

لا تقرب  لجباح  راه  نحل  عساسو

خباري  و خبارك   لمخزن  ف  راسو

لݣمح  ما يجي  ب  رْسالة

ويّام  الظالم   يوم   وْلا   غدّا  تْسالة

لّي  عشق  الزين  ما يِتحافا  وَلا  يِتلام

حب  لݣمرة  ماشي  حرام

هادو  غير  وْصِيّات  ب لمعاني  تْفَتْلو

راهُم  ما يحييو  وَلا  يْقُتْلو

          "البيدة محمد"