آش گالو//قلم الزجالة الباتول العقاد

آش گالو...!!؟

سير فحالك ...

راه گالو كلام 

ما فيه ليدام ...

وما عندنا به ما يدَّار

واش كاين شي خبار ...!!؟

ولا غير طاحت الصُّـمْـعة نعلقو الحجام  

ولا خليوه راه اليوم الجمعة من الليَّام ...

المُونَا قليلة 

والكرش هبيلة ...

جاها الجوع حتى ولَّات هـزيلة

وللي فلمطامر قصتو فلغْمال طويلة ...

تجيبو من الحانوت تلقى لبخوش داير فيه روينة

إوا آش نگولو علَ لعدس وعلَ لفول ما بقى رضَى بنا  ...

أما البوطا گاز ما كرهوش ايزيدو فيها كل شهر علينا

حتى للي كان يجي من لغمام كِفاش نشف من لَّعوينة ...

شوف للي محسوب خدام وما عندو عشا ليلة

واش يدير لَـمْـشَومَـر مع حالتو ما عندو حيلة ... 

و تَـلـقـانا ضاحكين بحال إلى الـحـالة كلـها زيـنة

وفمنا غير محلول ؤ لعقل مشطون كفاش دَّارْ بِـنـا ...

تمنينا الفرحة ما جات ؤ كثرة الـهَـمْ  مْـهـجـرو لينا

طِيرَة بگر كْثرت وجمعت المونة وهربت واش بقى لينا 

هاجت النسور علينا عـاسة تاكل لحمنا وعظام ترمينا ...

لبگيرة غير مَنْ شُوفَتْ كرشها هزيلة لا حلَـيْـبة لا سمينة 

ما لـگـات ف الحصيدة ما تاكل ولا فالزريبة علف وتبينة ...

حرثنا وزرعنا ف أرض ناشفة مولانا يرحمنا وليه هازين  ايدينا

توحشنا ريحة التراب بحال إلى ما عـمَّـرنَا عليه تمشينا ...

يلاه ياخوتي نديرو لكتف عل لكتف نشَـمّْـرو عـلَ يدينا 

الـشـتا صـبَّـات و ايَّـام الخير جايَّة بِالصَّابة گمح وفارينة ...

صَـفِّـيوْ غير نيتكم يا بنادم ؤ ربي غادي يشوف فينا 

مولانا يقبل توبـتنا هـو للي فيه الخير يحسن بنا ...

لكلام مايسالي علَ هم الناس عْ اللَّه ياهَدُوك حْسو بنا

ؤ ما تـدِّيـوْش عـلَ هبالي راني غير بوهـالـيَّـة مجدوبة

هازني الحال مَكْواني نعدِّي وراضية بلي ربي مْقسمو لينا ..

الشاعرة الزجال الباتول العقاد