سَلًمْ لا تَندَمْ/قصيدة زجلية للشاعر انفلوس محمد
سلم بالأمر سلم
وقبل ماتكلم
خصك تعرف او تفهم
الرويضة كاتدور
والماشينة خصها شيفور
والشيفور يكون معلم
حابك الشغل أو مهتم
دارس قواعد اللعبة
ومدوز الخيل والسربة
ومشمر كمامو
وللعاود شاد لجامو
والمكحلة ديما الفوق
فكل موسم أو سوق
الله يرزقنا القناعة
ويحفظنا من الطماعة
وكتاب المكتوب
والمكتوب ماعليه هروب
الحاضي هو مولانا
والساعة دايزة زربانة
سير غي بالمهل والنية
والحاجة اللي معكسة
ديما تكون مقضية
خمم لدواير الزمان
وكيف تحقق الأمان
وتسعد هاذ الإنسان
اللي عليك معول
ومارضي يعيش فالذل
والحال اليوم تبدل
المعيشة غلات
دارت الجناح وفرفرات
والسر فالساكن
ماشي فالمسكون
واللي بغات تكون
غير تكون
بلا لف بلا دوران
والقغل عيا من السدان
واللعبة تكشفت لعيان
كلشي راه بان
غير سير نيشان
انفلوس محمد
Commentaires
Enregistrer un commentaire