زيارة المدن // قلم الزجال المبدع ميصر عبد اللطيف
يالله نزورو لمدون
ريح بالك يا لمشطون
علاش أنت مهموم
مهموم وهايم
يالله ندوزو الفاس
فيه شرفة فيه ناس
فيه لحلاوي فكاس
فيه الطالب والعالم
يالله ندوزو المكناس
صيتية وبراد وكاس
عيساوي جدبة بلقياس
خضرا ديك لعلالم
يالله ندوزو لرابا
يالله يابابا دابا
حسان عالية فسما
بورقراق فلوكة وما
ولملحون مزينو بنغما
ونوار نواع تما
وفلموضة لاتزيد كلمة
زايرها أنا ومدايم
نديرو دورة فباب رواح
ونطلبو رحمة على دوك رواح
رضاو بشهادة وجراح
مارضاو بإستعمار ضالم
يالله لديك للبيضة
لمنورة ديك لوريدة
الموسم وتبوريدة
فيها زين الماسم
نديرو دورة فالمرسى
إسم زرقطوني مايتنسى
حدا نافورة اجلس ورسى
خلي لحمام حداها حايم
يالله ندوزو الأطلس
جلالب منوعة تفركس
وجبل عالي وملس
خاصك ليه سلالم
يالله ندوزو الإفران
على جمالو غنى فنان
ماحلى جمال إفران
هضرو عليه وقالو
ثلوج مغطية جبالو
مرة صافي مرة غايم
يالله ندوزو الوجدة
من طرق طالعة ومهودة
ألف مرحبا والميدة
واللحم فيها عرارم
يالله ندوزو اگادير
فيه لحال بارد زمرير
فيه يحلى نعاس وشخيؤ
تگعد أداك نايم
يالله ندوزو لحاوز
لابغيتي حيدوس وداوز
داوز يابابا داوز داوز
أراك ركزة وتقاسم
يالله لسيدي رحال
داوي لاكاينش هبال
ونرجعو لبني ملال
تمة يشدك الحال
فيها زين فيها عيون
فيها عين أسردون
فيها نوار وزيتون
فيها بلاغي وسلاهم
يالله ندوزو لطنجة
فيها سواق امروجة
وسفينة فلبحر مدرجة
والحوت فشبكة عايم
يالله مراكش الحمرا
وتشوف نخل ومنارة
جامع لفنا و الگمرا
يالله نزيدو نزيدو
كلها يسوق كوتشي بيدو
العاود حافض طريق وفاهم
يالله ندوزو الصحرا
لعيون وساقية الحمرا
وتسمع ضربات الگدرا
فيها نغمة فيها حضرا
وجماعة بيها ضايرة
وجمال فرمال سايرة
والتمر فنخل امحازم
هي بلادي بلاد جدادي
هي بلادي ومورادي
والواد ياسيدي وادي
الله يعميها لداك الضالم
ميصر عبد اللطيف 17 5 2023
Commentaires
Enregistrer un commentaire