الفياق بكري من الذهب مشري/ قلم الاستاذ الزجال . عبد الله لحريز

 الفياق بكري من الذهب مشري 

لي فات مات  وربي عالم بالجايات 

عيش وغني وفرح وبدل العتبات

واستمتع وماتفكر في الكيات 

انت غير دايز كيف الخيات 

كون دامت كون تدوم لقارون 

ومايغرق في البحر فرعون 

 قال انا الاله وطغى وتجبر

ومايفنى النمرود بن كنعان 

عرف الحق وعليه تكبر 

عيشها ودير حسابك 

لا العديان يفكو قفل بابك 

تبقى ضحكة بين صحابك وحبابك

حضي لي ليك وكون على بال 

وخلي بنادم ،تعطيه الجنة مايعجبو حال 

عقلها وتوكل لاتبقى تتعكل 

بالحجج والخاويات 

الحياة لمن يسعى ويتوكل 

ماشي لي مدوزها حجايات

نوض المكي مالك متكي 

الناس درسات والوقت تبدلات

تصافات وتعافات ومابقى للضيف فين يبات 

نوض تسعى وشمر 

راك تتسناه يكبر 

وهو يتسناك تغبر

قالوا الناس الاولين الفياق بكري من الذهب مشري